தூக்கில் தொங்கிய நிலையில் குடும்பத்தரின் சடலம் பொலிஸாரால் மீட்பு

வேப்பமரத்தில் தூக்கில் தொங்கிய நிலையில் குடும்பத்தர் ; ஒருவருடைய சடலம் ஒன்றை யாழ்ப்பாணப் பொலிஸார் இன்று அதிகாலை மீட்டுள்ளனர். இச்சடலம் கண்டி வீதி அரியாலைப் பகுதியில் இருந்து காலை சுமார் 5.30 மணியளவில் மீட்கப்பட்டுள்ளது. இதில் அதே இடத்தைச் சேர்ந்த கோ.உதயசீலன் வயது 27 என்றவரே சடலமாக மீட்கப்பட்டவராவார்.

இவரது சடலம் பிரேதப் பரிசோதனைகளுக்காக யாழ்.போதனா வைத்தியசாலையில் ஒப்படைக்கப்பட்டுள்ளது.

இச்சம்பவம் தொடர்பில் யாழ்ப்பாணப் பொலிஸார் விசாரணைகளை மேற்கொண்டு வருகின்றனர். இவர் கடன் தொல்லையால் அவதிப்பட்டு வந்ததாக பொது மக்கள் தெரிவிக்கின்றனர்..

சிகிச்சைக்கு வந்த பெண்ணைக் வல்லுறவுக்கு உட்படுத்திய வைத்தியர் இந்தியாவின் புனேயில் சம்பவம்

இந்தியாவின் மகாராஷ்டிர மாநிலம் புனேயில் சிகிச்சைக்கு வந்த பெண்ணொருவரை சிகிச்சையளிக்க வந்த வைத்தியர் ஒருவர் பாலியல் வல்லுறவுக்கு உட்படுத்திய சம்பவம் ஒன்று இடம்பெற்றுள்ளது. புனேயின் மாடர்ன் கல்லூரி மைதானத்தில் கடந்த 2010-ம் ஆண்டு அக்டோபர் மாதம் 16-ம் தேதி துர்கா பூஜை நடைபெற்றது.

இதில் கலந்துகொள்வதற்காக கணவன் மற்றும் குழந்தைகளுடன் வந்திருந்த 30 வயது பெண்ணுக்கு உடல்நலக்குறைவு ஏற்பட்டது.

உடனடியாக அந்தப்பெண் வாஷியில் உள்ள லோட்டஸ் மருத்துவமனையில் சேர்க்கப்பட்டார். இரவில் அவரது உடல்நிலை மோசமடைந்ததால் ஐ.சி.யு. வார்டில் அனுமதிக்கப்பட்டார். பரிசோதனைக்குப் பிறகு நர்ஸ் வீட்டுக்கு சென்றுவிட்டார்.

அப்போது அந்தப் பெண்ணுக்கு சிகிச்சை அளித்த டாக்டர் விஷால் வன்னி (வயது 26), தூக்க மருந்து கலந்த ஊசி போட்டுள்ளார்.

பின்னர் அந்தப் பெண்ணை கற்பழித்துள்ளார். காலையில் கண்விழித்து பார்த்த அந்தப் பெண் தனக்கு நேர்ந்த கொடுமையை கணவனிடம் கூற, அனைவரும் டாக்டரைப் பிடித்து போலீசில் ஒப்படைத்தனர்.

அவர் மீதான வழக்கு தானே கூடுதல் அமர்வு நீதிமன்றத்தில் நடைபெற்று வந்தது. வழக்கை விசாரித்த நிதிபதி சந்தியா பச்சாவ், சிகிச்சைக்கு வந்த பெண்ணை கற்பழித்த டாக்டர் விஷாலுக்கு 10 ஆண்டு சிறைத் தண்டனை விதித்து தீர்ப்பளித்தார்.

அவுஸ்ரேலியா நோக்கிச் சென்ற படகு விபத்து இலங்கையர் இருவர் பலி 20 மீனவர்களால் காப்பாற்றப்பட்டனர்

அவுஸ்ரேலியா நோக்கி புகலிடக் கோரிக்கையாளர்களை ஏற்றிக் கொண்டு சென்ற படகொன்று விபத்திற்குள்ளாகியுள்ளது. இதில் இலங்கையில் இருவர் பலியாகியுள்ளதோடு 20 பேர் இந்தோனிசய மீனவர்களால் காப்பாற்றப்பட்டுள்ளனர். குறித்த படகு யாவாக் கரைக்கு அப்பால் ஒரு பாறையில் மோதியே இரண்டாக பிளவுப்பட்டு விபத்துக்குள்ளாகியுள்ளது.

இந்த விபத்தில் இலங்கையர்கள் இருவர் நீரில் மூழ்கி மரணமடைந்ததாகவும் ஒருவர் காணாமல் போனதாகவும் தெரிவிக்கப்படுகின்றது.

எஞ்சிய 20 பேரும் மீனவர்களால் காப்பாற்றப்பட்டு தற்போது இந்தோனேஷிய தீவான நுஸா கம்பன்கனில் தங்கவைக்கப்பட்டுள்ளனர்.
இவ்வாறு காப்பாற்றப்பட்டவர்களில் நான்கு வயது சிறுவனும் 10 வயது பெண்பிள்ளை ஒன்றும் அடங்குகின்றனர்.

கிழக்கு மக்களுக்காக யாழ்ப்பாணத்தில் வெள்ள நிவாரணம் யாழ். பல்கலைக்கழக மாணவர் ஒன்றியம் சேகரிக்கின்றது

வெள்ள அனர்த்தத்தினால் பாதிக்கப்பட்ட கிழக்கு மாகாண மக்களுக்கு வெள்ளநிவாரணம் வழங்குவதற்காக யாழ்.நகர் பகுதியில் உள்ள வர்த்தக நிலையங்களில் நிவாரணப் பொருட்களை சேகரிக்குமு; நடவடிக்கையென்றை யாழ்.பல்கலைக்கழக கலைப்பீட மாணவர் ஒன்றியம் மேற்கொள்ளவுள்ளது.

கடும் மழையினால் பாதிக்கப்பட்ட கிழக்கு மாகாணத்தின் அம்பாறை மட்டக்களப்பு மாவட்ட மக்களுக்கு நிவாரணம் வழங்கும் முகமாகவே இந்நடவடிக்கையை மேற்கொள்ள திட்டமிட்டுள்ளதாக கலைப்பீட மாணவர் ஒன்றியத் தலைவர் அறிவித்துள்ளார்.

இந்நிவாரணப் பொருட்களை சேகரிக்கும் நடவடிக்கையானது நாளை 30ஆம் திகதி காலை 8.30 மணி முதல் யாழ்.நகரிலுள்ள வர்த்தக நிலையங்களில் மேற்கொள்ளப்படவுள்ளது.

இளங்குடும்பப் பெண் கிணற்றிருந்து சடலமாக மீட்பு கொலை எனச் சந்தேகம் ? -படம் இணைப்பு

இளம் குடும்பப் பெண்ணொருவரின் சடலம் ஒன்று கிணற்றுக்குள் இருந்து கோப்பாய் பொலிஸாரால் மீட்கப்பட்ட சம்பவம் ஒன்று கோப்பாய் மத்திப் பகுதியில் இருந்து மீட்கப்பட்டுள்ளது.இச்சம்பவம் பலானை சூசையப்பர் வீதி வீதி கோப்பாய் மத்தி என்ற பகுதியில் இன்று இடம்பெற்றுள்ளது.

இச்சம்பவத்தில் அதே இடத்தைச் சேர்ந்த கமலதீபன் கயல்விழி (வயது 23) என்ற குடும்பப் பெண்ணே சடலமாக மீட்கப்பட்டவராவார்.
நேற்று முன்தினம் திங்கட்கிழமை இரவு கணவனுக்கும் மனைவிக்கும் இடையில் தகராறு இடம்பெற்றதாக அயலவர்கள் தெரிவித்தனர்.

இதனைத் தொடர்ந்து அவர்களது காணியிலுள்ள கிணற்றுக்குள் குறித்த பெண் சடலமாக இருப்பதை அயலவர்கள் அவதானித்துள்ளனர்.

இதனைத் தொடர்ந்து சம்பவ இடத்திற்கு வருகைதந்த பதில் நீதிவான் மு.திருநாவுக்கரசு விசாரணைகளை மேற்கொண்டதோடு சடலத்தை பிரேதப் பரிசோதனைகளுக்காக யாழ்.போதனா வைத்தியசாலையில் ஒப்படைக்க உத்தரவிட்டார்.

மேலும் இச்சம்பவம் தொடர்பில் சந்தேகத்தின் பெயரில் பெண்ணின் கணவன் நேற்றுக் காலை கோப்பாய் பொலிஸாரல் கைது செய்யப்பட்டுள்ளார்.

கோப்பாய் பகுதியில் அடிகாயங்களுடன் பெண் ஒருவரின் சடலம் கிணற்றிலிருந்து மீட்பு. கணவர் கைது.

யாழ்ப்பாணம் கோப்பாய் மத்தி வீட்டுக் கிணற்றிலிருந்து அடிகாயங்களுடன் இளம் தாயின் சடலத்தை கோப்பாய் பொலிஸார் இன்று செவ்வாய்கிழமை நண்பகல் மீட்டுள்ளனர். ஒரு பிள்ளையின் தாயாரான கமலதீபன் கஜந்தினி (வயது 23) என்பவரே சடலமாக மீட்கப்பட்டவராவார். இவரது சடலத்தில் பலத்த அடிகாயங்கள் காணப்படுவதாகவும் இவரது மரணம் தொடர்பில் சந்தேகத்தில் அப்பெண்ணின் கணவர் கைது செய்யப்பட்டுள்ளதாகவும் கோப்பாய் பொலிஸார் குறிப்பிட்டுள்ளனர்.

தற்போது சடலம் பிரேத பரிசோதனைக்காக யாழ். போதனா வைத்தியசாலையில் வைக்கப்பட்டுள்ளது.

இதேவேளை, யாழ். தொண்டைமானாறு வல்லை வீதியோரமாகவுள்ள ஒற்றைப்பனையடி வயல் கிணற்றிலிருந்து குடும்பஸ்தர் ஒருவர் சடலமாக மீட்கப்பட்டுள்ளதாக வல்வெட்டித்துறைப் பொலிஸார் தெரிவித்துள்ளனர். நேற்று (28) இச்சடலம் மீட்கப்பட்டுள்ளதாகவும் இதில் கொத்தியகாடு கெருடாவில் தெற்கு தொண்டைமானாற்றைச் சேர்ந்த கிட்டினன் தவராசா (வயது - 50) என்ற 3 பிள்ளைகளின் தந்தையே இவ்வாறு சடலமாக மீட்கப்பட்டுள்ளார்.

இச்சம்பவம் தொடர்பாக மேலும் தெரியவருவதாவது,

குறித்த நபர் கடந்த சனிக்கிழமை பி.ப. 6 மணியிலிருந்து காணாமல் போனதையடுத்து அவரது மனைவி மற்றும் உறவினர்கள் அவரைத் தேடிய நிலையில் நேற்று முன்தினம் ஞாயிற்றுக்கிழமை வல்வெட்டித்துறை பொலிஸ் நிலையத்தில் முறைப்பாடு செய்தனர்.

அதன் பின்னரும் தொடர்ந்து தேடிய நிலையில் வயல் கிணற்றிலிருந்து தொலைதூரத்தில் சைக்கிள் ஒன்று நிற்பதை அடுத்து உறவினர்கள் வயல் கிணறுகளில் தேடிப்பார்த்தபோதே குறித்த வயல் கிணற்றில் மேற்படி குடும்பஸ்தர் இறந்த நிலையில் சடலமாக கிடப்பது தெரியவந்தது.

இதனையடுத்து உறவினர்கள் பொலிஸாருக்கு தெரியப்படுத்தியதை அடுத்து சம்பவ இடத்திற்கு வந்த பொலிஸாரும் வல்வெட்டித்துறை மரண விசாரணை அதிகாரி சுசீந்திரசிங்கம் ஆகியோர் விசாரணையை மேற்கொண்ட பின்னர் சடலம் பிரேத பரிசோதனைக்காக வல்வெட்டித்துறை ஆதார வைத்தியசாலையில் வைக்கப்பட்டதுடன் பிரேத பரிசோதனையை டாக்டர் மயிலேறும்பெருமாள் மேற்கொண்டார்.

இதன் பின்னர் மரண விசாரணையின் போது குறித்த நபர் கடந்த 2 வருடங்களாக வேலை இல்லாமல் மனஉளைச்சலுடன் காணப்பட்டதாகவும் அத்துடன் இவருக்கு ஏற்கனவே நோயுள்ளதாகவும் இவர் கிணற்றில் விழுந்து மூச்சுத் திணறியே இறந்துள்ளதாகவும் தெரிவிக்கப்படுகிறது.

குறைந்த வருமானம் உள்ளவர்களுக்காக கொம்பனித்தெருவில் மாடிவீடு

கொம்பனித்தெருவில் குடிசைகளுக்கு பதிலாக, சகல வசதிகளுடனும் கூடிய நிரந்தர மாடி வீட்டு கட்டிடத்தொகுதியை நிர்மாணிக்க, பாதுகாப்பு மற்றும் நகர அபிவிருத்தி அமைச்சு நடவடிக்கைகளை எடுத்துள்ளது. இத்திட்டத்தின் கீழ், 10 ஆயிரம் வீடுகள் நிர்மாணிக்கப்படுகின்றன. கொழும்பு நகரில் வாழும் குடிசை வாசிகள் மற்றும் குறைந்த வருமானம் பெறும் குடும்பங்களுக்கிடையே இவ்வீடுகள் வழங்கப்படவுள்ளன.

பாதுகாப்பு அமைச்சின் செயலாளர் கோட்டாபய ராஜபக்ஷவின் மேற்பார்வையில் நிர்மாணிக்கப்படும் வீடுகள், ஹேனமுல்ல, அளுத்மாவத்தை, பேர்குசன் வீதி, சிவில் சி பெரேரா மாவத்தை, எதிரிசிங்க மாவத்தை, மாளிகாவத்த, மாளிகாவத்த புகையிரத நிலையத்திற்கு சொந்தமான காணி, தெமட்டகொட புகையிரத திணைக்களத்திற்கு சொந்தமான காணி, 31வது தோட்டம், ஒறுகொடவத்த செயற்திட்டம், 54 மற்றும் 66ஆம் தோட்ட செயற்திட்டம், கொலன்னாவ அரச தொழிற்சாலை வளாக பிரதேசங்களில் நிர்மாணப் பணிகள் மேற்கொள்ளப்படுகின்றன.

கொம்பனித்தெருவில் உள்ள குடிசைகளை அகற்றுவது தொடர்பாக மக்களை அறிவுறுத்தும் வேலைத்திட்டம், நேற்று பாதுகாப்பு செயலாளரின் தலைமையில் இடம்பெற்றது, பிரதேச மக்கள் எதிர்கொள்ளும் பிரச்சினைகள், இதன்போது முன்வைக்கப்பட்டதுடன், அதற்காக செயற்படுத்த வேண்டிய நடவடிக்கைகள் தொடர்பாகவும், பாதுகாப்பு செயலாளர் விளக்கமளித்தார். இம்மக்கள், தற்போது வாழும் நிலைமையை விட, உயரிய வாழ்க்கைத் தரத்தை வழங்குவதற்கு தேவையான சகல ஏற்பாடுகளும் அரசாங்கத்தினால் மேற்கொள்ளப்பட்டுள்ளதாக, பாதுகாப்பு செயலாளர் தெரிவித்தார். கொம்பனித்தெருவில் வசிப்போருக்கான வீடமைப்பு கட்டிடத் தொகுதி, அப்பிரதேசத்திலேயே நிர்மாணிக்கப்படுகிறது. நிர்மாணப் பணிகள் பூர்த்தியடையும் வரை, இக்குடிசை வாசிகளை வேறு இடங்களில் குடியமர்த்த, விசேட வேலைத்திட்டங்கள் அமுல்ப்படுத்தப்பட்டுள்ளன. அவர்களுக்கு தேவையானவாறு மாற்று சந்தர்ப்பங்களை தேர்ந்தெடுக்கவும், வாய்ப்புகள் வழங்கப்பட்டுள்ளன. அவர்களின் தீர்மானங்களை, ஒரு வாரத்திற்குள் நகர அபிவிருத்தி அதிகார சபைக்கு அறிவிக்க வேண்டும். எந்தவொரு நபருக்கும் அநீதி இழைக்கப்படாதவாறு தேவையான செயற்பாடுகள் மேற்கொள்ளப்படுமென, பாதுகாப்பு செயலாளர் கூறினார்.

இந்த மாடி வீட்டு கட்டிடத்தொகுதி நிர்மாணிக்கப்பட்டதன் பின்னர், தற்போதைய நிலைமையை விட, மக்களின் வாழ்வில் மாற்றங்கள் ஏற்படும். எவருக்கும் அநீதி இழைப்பது, எமது நோக்கமல்ல. தேவையான ஒழுங்குகளை மேற்கொண்டு, மக்களின் தேவைகளை பூர்த்தி செய், நடவடிக்கை எடுத்துள்ளோம். கொழும்பில் உள்ள வேறு மாடி கட்டிடங்களை போன்று அல்லாமல், மாற்றமான வசதிமிக்க மாடிவீட்டு கட்டிடத் தொகுதியாக இவை அமையவுள்ளன. அதி உயரிய வசதிகளுடனேயே, நாம் நிர்மாணிக்கின்றோம். சூழலில் ஏற்படக்கூடிய மாற்றம், மிகப்பெறுமதிமிக்கதாக அமையும். உங்களுக்கு இவ்வாறானதொரு வாழ்க்கைத் தரத்தை ஏற்படுத்திக்கொடுப்பதே, எமது நோக்கமாகும். உண்மையிலேயே, நீங்களே வெற்றியாளர்களாக மாற்றம் பெறுவீர்கள். வாழ்வதற்கு சிறந்த சூழவை ஏற்படுத்தி, மக்களின் வாழ்க்கைத் தரத்தை முன்னேற்றுவதே, நகர அபிவிருத்தி அதிகார சபையின் நோக்கமாகும். நாம் எந்த சந்தர்ப்பத்திலும் உங்களுக்கு கிடைக்குமு; வெற்றிகள் தொடர்பிலேயே, கவனம் செலுத்துகின்றோம். இதுவே இந்த செயற்திட்டத்தின் பிரதான நோக்கமாகும்.)

சிரேஷ்ட அமைச்சர் ஏ.எச்.எம். பௌஸி, பிரதியமைச்சர் பைஸர் முஸ்தபா, பாராளுமன்ற உறுப்பினர் திலங்க சுமதிபால உள்ளிட்டோரும், இதில் இணைந்திருந்தனர்.