அமெரிக்க ஏவுகணை தாக்குதலில் பாகிஸ்தான் தலிபான் தலைவன் பலி‘

தீவிரவாதிகள் பதுங்கியிருப்பதாக கிடைத்த தகவலை தொடர்ந்து வடக்கு பாகிஸ்தானின் மிரான்ஷா பகுதியில் காஷ்மா என்ற கிராமத்தில் ஒரு வீட்டின் மீது அமெரிக்காவின் ஆளில்லா விமானங்கள் இன்று காலை ஏவுகணை வீசி தாக்குதல் நடத்தின.

அதில், அந்த வீடு இடித்து தரைமட்டமானது. இடிபாடுகளில் சிக்கி வீட்டில் தங்கியிருந்த 6 பேர் பலியாகினர். 2 பேர் காயம் அடைந்தனர்.

இந்த தாக்குதலில் பாகிஸ்தான் தலிபான் இயக்கத்தின் 2ம் கட்ட தலைவனான வலி-யுர்-ரஹ்மான் கொல்லப்பட்டதாக பாகிஸ்தான் பாதுகாப்பு துறை அதிகாரிகள் கூறியுள்ளனர்.

ஆப்கானிய தலிபான் இயக்கத்தின் ஆதரவு பெற்ற தெஹ்ரிக்-இ-தலிபான் பாகிஸ்தான் இயக்கத்தின் தற்போதைய தலைவனாக ஹக்கீமுல்லா மெஹ்பூத் உள்ளான்.

அவனுக்கு அடுத்தபடியாக தலைமை பொறுப்பை ஏற்கவிருந்த விலி-யுர்-ரஹ்மான் இன்றைய அமெரிக்க ஆளில்லா விமான தாக்குதலில் கொல்லப்பட்ட சம்பவம் தலிபான்களுக்கு ஏற்பட்ட கடும் பின்னடைவாக கருதப்படுகிறது.

கடந்த 11-ந்தேதி பாகிஸ்தானில் பாராளுமன்ற தேர்தல் நடந்தது. அதன் பிறகு தற்போதுதான் முதன்முறையாக அமெரிக்காவின் இத்தாக்குதல் நடைபெற்றுள்ளது.

இலங்கை விமானப்படையினால் காப்பாற்றப்பட்ட வன்னி இளைஞனின் கை.

கடந்த 25ம் திகதி அன்று வன்னியில் வறுமைக்கோட்டின் கீழ் நாளாந்த உழைப்பில் வாழும் இளைஞன் ஒருவன் வழமைபோல் வன்னியிலுள்ள மரச்காலை ஒன்றில் வேலை செய்து கொண்டிருந்தான். மாலை 6.30 மணியளவில் அங்குள்ள இயந்திர வாள் இளைஞனின் கையை பதம் பார்த்தது. உடன் வேலை செய்தவர்கள் தோழுக்கு சற்று கீழ் அறுந்து தொங்கும் கையுடன் அவனை கிளிநொச்சி வைத்தியசாலைக்கு அள்ளிச் சென்றனர்.

இளைஞனின் நிலைமையை பரிசோதித்த கிளிநொச்சி வைத்திசாலை வைத்தியர்களுக்கு இரு தெரிவுகள் இருந்தது. முதலாவது தெரிவு, நான்கு மணித்தியாலய நேரத்தினுள் விசேட சத்திர சிகிச்சை ஒன்று செய்தால் கையை மீண்டும் ஒட்டலாம். ஆனால் அதற்கான உபகரணங்கள் கொழும்பு பெரிய ஆஸ்பத்திரியில் மாத்திரமே உண்டு. இரண்டாவது தெரிவு கையை அறுந்த இடத்தால் வெட்டி விடுவது.

வைத்தியசாலை நிர்வாகம் வன்னி மாவட்ட இராணுவத் தளபதி மேஜர் ஜெனரல் உதய பெரேராவை தொடர்பு கொண்டு நிலையை எடுத்துக்கூறியது. உழைக்கும் கரம் ஒன்று அறுத்தெறியப்பட்டால்;, அந்தக் கையில் தங்கிவாழும் உயிர்களின் எதிர்காலத்தை கேள்வி உள்ளாக்க விரும்பாத தளபதி உடனடியாக செயற்பாட்டில் இறங்கினார். விமானப்படைத் தலைமையகத்தை தொடர்பு கொண்டு விசேட உலங்கு வானூர்தி ஒன்றிற்கு ஒழுங்கு செய்தார். சில நிமிட நேரங்களில் வைத்தியசாலைக்கு அருகாமையில் இறங்கிய இலங்கை விமானப்படைக்கு சொந்தமான உலங்கு வானுர்தி அறுந்து தொங்கும் கைக்கு முதலுதவி வழங்கப்பட்டிருந்த இளைஞனை ஏற்றிக்கொண்டு கொழும்பு பெரிய ஆஸ்பத்திரி நோக்கி பறந்தது. கொழும்பு பெரிய ஆஸ்பத்திரியில் அனுமதிக்கப்பட்டுள்ள இளைஞனுக்கு எயளஉரடயச ளரசபநசல செய்யப்பட்டதாகவும் அவன் தேறி வருவதாகவும் அறிய முடிகின்றது.

இது தொடர்பில் கருத்துரைத்துள்ள கிளிநொச்சி வைத்திசாலையின் பிரதான வைத்திய அதிகாரி, சிவில் மற்றும் இராணுவ அதிகாரிகளுடனான புரிந்துணர்வுடனான ஒத்துழைப்பு மிகவும் இன்றியமையாதது என்றும் அவ்வாறு தாம் வன்னி இராணுவத் தலைமையகத்துடன் பேணிவரும் உத்தியோகபூர்வ ஒத்துழைப்புக்களால் குறித்த இளைஞனுக்கு உரிய உதவியளிக்க முடிந்ததாகவும் குறிப்பிட்டுள்ளார்.

தமிழ் தேசியக் கூட்டமைப்பு தமது அரசியல் லாபங்களுக்காக வடகிழக்கிலிருந்து வெளியேறவேண்டும் எனக் கோஷம் எழுப்புகின்றனர். ஆனால் இவ்வாறான அனர்த்தங்களின்போது இராணுவத்தினரே மக்களுக்கு உதவுகின்றனர் என்பது சம்பந்தப்பட்ட பிரதேசங்களில் வசிக்கும் மக்களது ஏகோபித்து கருத்தாக உள்ளது.

தடுப்பில் உள்ள புலிகள் பெயர் விபரங்களை வெளியிட தயார்!

அரசாங்கத்தின் தடுப்புக் காவலில் தடுத்து வைக்கப்பட்டுள்ள புலிகள், மற்றும் புலிகளின் சிரேஷ்ட தலைவர்கள் தொடர்பாக விபரங்களை வெளியிட தயார் என இலங்கைக்கான ஐ.நாவின் பிரதிநிதிகளில் ஒருவரான ரவிநாத் ஆரியசிங்க தெரிவித்துள்ளார்.

இலங்கைப் புலனாய்வுத் துறையினர் இதுவரை புலிகள் இயக்கத்தில் இருந்து இறுதிக்கட்ட யுத்தத்தில் சரணடைந்த மற்றும் கைது செய்யப்பட்ட புலிகள் தொடர்பாக அவர்களது உறவுகளால் சுமார் 3,200 முறைப்பாடுகள் கிடைக்க பெற்றதாக தெரிவித்த ஆரியசிங்க, இதில் 2,729 முறைப்பாடுகளே முறையாகப் பதிவுசெய்யப்பட்டுள்ளதாக குறிப்பிட்டார்.

பதிவு செய்யப்பட்ட 2, 729 முறைப்பாடுகளில் 1,101 முறைப்பாடுகள் குறித்து தாம் இதுரையில் விசாரணை மேற்கொண்டுள்ளதாக குறிப்பிட்ட அவர் தமது தடுப்பில் உள்ள புலிகள் மற்றும் சிரேஷ்ட தலைவர்கள் குறித்த விபரங்களை வெளியிட தயார் என்று ரவிநாத் ஆரியசிங்க கூறியுள்ளார்.

பாசிக்குடா கடற்கரையை அழகு படுத்த நடவடிக்கை!.

சுற்றுலாப் பயனிகளின் வசதி கருதி கிழக்கு மாகாணத்தில் சுற்றுலாத்துறைக்கு பிரசித்தி பெற்ற பாசிக்குடா கடற்கரையை அழகுபடுத்தும் நடவடிக்கைகள் மேற்கொள்ளப்பட்டு வருவதாக சுற்றுலா அபிவிருத்தி அதிகார சபையின் வள நிலைய அதிகாரி ஏ.ராமச்சந்திரன் தெரிவித்தார்.

பொருளாதார அபிவிருத்தி அமைச்சின் கீழ் இயங்கும் சுற்றுலா அபிவிருத்தி அதிகார சபையின் பணிப்புரைக்கு அமைவாக பாசிக்குடா கடற்கரைப் பிரதேசத்தில் துப்புரவு பணிகள் முன்னெடுக்கப்படுவதாக அவர் தெரிவித்தார்.

பாசிக்குடா கடற்கரையை அழகு படுத்தும் நடவடிக்கைக்கு, கல்குடா இராணுவம், கல்குடா பொலிஸார், சிறு வியாபாரிகள் சங்கம், சவாரி போட் சங்கம், ஹோட்டல் சங்கம், வாழைச்சேனை பிரதேச சபை, மீன் வியாபாரிகள் சங்கம் என்ப வற்றின் ஒத்துழைப்புடன் நேற்றைய தினம் சிரமதான பணி ஒன்று நடைபெற்றதாக குறிப்பிட்டார்.

பிரான்ஸ் நாட்டு இளைஞனின் ‘ரொக்கெட் துவிச்சக்கரவண்டி’

பிரான்ஸ் நாட்டைச் சேர்ந்த பிரான்கொய்ஸ் கிஸ்ஸி என்ற இளைஞர் ஒருவர் மணிக்கு 263 கி.மீ வேகத்தில் துவிச்சக்கரவண்டியில் பயணித்து சாதனை படைத்துள்ளார்.

சாதாணரமான துவிச்சக்கரவண்டியில் ஹைட்ரஜன் பேரொக்சைடில் இயங்கும் ரொக்கட் சாதனத்தைப் பொருத்தியுள்ளதுடன் இந்த துவிச்சக்கரவண்டியைக்கொண்டு பிரானஸின் வடகிழக்கு பகுதிலுள்ள மன்ச்ஹொவுஸ் என்ற இடத்திலுள்ள பழைய ரன் வே ஒன்றிலே இச்சாதனை நிகழத்தப்பட்டுள்ளது.

மின்னல் வேகத்தில் சென்ற இந்த துவிச்சக்கரவண்டிக்கு ‘ரொக்கெட் துவிச்சக்கரவண்டி’ என பிரான்கொய்ஸ் பெயரிடப்பட்டுள்ளதுடன் ஹைட்ரஜன் பேரொக்சைட் நிரப்பப்பட்டிருக்கும் ரொக்கெட்டே பயன்படுத்த பட்டிருப்பதால் எதுவிதமான தீங்கும் இல்லை என தெரிவித்துள்ளார்.

இதற்கு முதல் 2002 ஆம் ஆண்டில் மணிக்கு 242.6 கி.மீற்றர் வேகத்தில் துவிச்சக்கரவண்டியில் சென்றமையே சாதனையாக இருந்தமை குறிப்பிடத்தக்கது.

ஐ.நா மனித உரிமை ஆணையாளர் இலங்கை வரலாம்! ஆனால் விசாரணைகள் தொடர்பில் மூச்சுவிடக்கூடாது! தே. தே. இ.

ஐ.நா மனித உரிமை ஆணைக்குழுவின் ஆணையாளர் நாயகம் நவநீதம்பிள்ளை இலங்கை வரலாம் வடக்கு கிழக்கிற்கு விஜயங்களை மேற்கொள்ளலாம். அதேபோல் அரச தலைவர்களுடன் பேச்சுவார்த்தைகள் கலந்துரை யாடல்களை நடத்தலாம். ஆனால் அரசியல் கருத்துக்களை பேசும் அதிகாரம் அவருக்பு இங்கு கிடையாது அத்துடன் விசாரணைகள் தொடர்பில் மூச்சுவிடக்கூடாது என தேசப்பற்றுள்ள தேசிய இயக்கத்தின் பொதுச் செயலாளர் டாக்டர் வசந்த பண்டார தெரிவித்துள்ளார்.

அத்துடன் வசந்த பண்டார மேலும் தெரிவிக்கையில், அமெரிக்கா இந்தியா, உட்பட மேற்கத்தேய நாடுகள் இலங்கையில் வட மாகாண சபைத் தேர்தலை நடத்துவதில் அதிக அக்கறை காட்டி வருகின்றன எனவும் ஐ.நா. மனித உரிமை ஆணைக்குழுவில் அமெரிக்கா இலங்கைகெதிராக முன்வைத்த பிரேரணையில் வட மாகாண சபை தேர்தல் நடத்தப்பட வேண்டுமென்றும் தெரிவித்திருந்தாகவும் அதனை நடைமுறைப்படுத்தும் நோக்கில் அரசாங்கத்தின் மீது கடும் அழுத்தத்தை வழங்கவே ஐ.நா மனித உரிமை ஆணைக்குழுவின் ஆணையாளர் நாயகம் நவநீதம்பிள்ளை இலங்கை வருகின்றார் என தெரிவித்துள்ளார்.

மேலும் இவ்வாறான அழுத்தங்களுக்கு அடி பணியாது அரசாங்கம் தைரியத்துடன் தீர்மானங்களை எடுக்க வேண்டும் எனவும், 13ஆவது அரசியலமைப்பு திருத்தத்தில் பல திருத்தங்கள் மேற்கொள்ள வேண்டும் எனவும், பிரிவினைவாத சட்டங்களை வைத்துக்கொண்டு தேர்தலை நடத்த முடியாது எனவும் வசந்த பண்டார தெரிவித்தார்.

தமிழ் மக்களின் வாக்குகளை இலக்கு வைத்தே கனடா பொதுநலவாய மாநாட்டை புறக்கணிக்க முயற்சிக்கின்றது!

கனேடிய வாழ் தமிழ் மக்களின் வாக்குகளை இலக்கு வைத்தே தற்போதைய கனடிய அரசாங்கம் செயற் படுகின்றது என்றும், தமிழ் வாக்காளர்களின் ஆதரவை திரட்டுவதையும், உள்நாட்டு அரசியல் நோக்கங்களையும் அடிப்படையாகக் கொண்டே கனடா இலங்கையில் நடைபெறவிருக்கும் பொதுநலவாய நாடுகள் தலவைர்கள் மாநாட்டை புறக்கணிக்க முயற்சித்து வருகின்றது என இலங்கைக்கான கனடாவின் முன்னாள் உயர்ஸ்தானிகர் மார்டின் கொலாகொட் தெரிவித்துள்ளார்.

மேலும், இலங்கை மனித உரிமை நிலைமைகள் தொடர்பில் சர்ச்சைகள் காணப்பட்டாலும், யுத்தத்தின் பின்னர் மனித உரிமை நிலைமைகள் மேம்படுத்தப்பட வேண்டுமென தான் எதிர்பார்கின்றேன் என தெரிவித்த மார்டின் கொலாகொட, கொழும்பில் நடைபெறவுள்ள பொதுநலவாய நாடுகள் தலைவர்கள் மாநாட்டை கனேடிய அரசாங்கம் மட்டும் புறக்கணிப்பது உள்நாட்டு அரசியலை கருத்திற் கொண்டே என தாம் கருதுகின்றேன் என குறிப்பிட்டுள்ளார்.

1983ஆம் ஆண்டு காலப் பகுதியில் கொலாகொட் இலங்கையில் கடமையாற்றியுள்ளார் என்பது குறிப்பிடத்தக்கது.